Кыргызстанда кыргыз-беларус бизнес-форуму өтөт
Бишкекте кыргыз-беларус бизнес-форумун өткөрүүгө даярдык жүрүүдө. Бул тууралуу КРнын Беларусь Республикасындагы Атайын жана Ыйгарым укуктуу Элчиси Эрбол Султанбаев билдирди.
Анын айтымында, элчи Беларусь Соода өнөр-жай палатасынын төрагасы Михаил Мятликов менен жолугушуп, үстүбүздөгү жылдын июнь айында Бишкек шаарында өтө турган кыргыз-беларус бизнес-форумуна даярдык маселелери талкууланды. Форум эки өлкөнүн ишкерлеринин ортосундагы түз байланыштарды чыңдоого багытталат.
Белгиленгендей, бул иш-чара буга чейинки кызматташтыктын уландысы болуп саналат. Эске салсак, 2025-жылдын июнь айында кыргыз-беларус бизнес-форуму Минск шаарында өткөн.
Акыркы жылдары эки өлкөнүн ишкер чөйрөлөрүнүн байланышы күчөп, соода жүгүртүү көлөмү да өсүүдө. Тактап айтканда, 2023-жылы Кыргызстан менен Беларустун ортосундагы соода жүгүртүү 117,7 млн долларды түзсө, 2025-жылы бул көрсөткүч 206,8 млн долларга жетип, дээрлик эки эсеге көбөйгөн. Ошондой эле Кыргызстандын экспорту 30 % ашык өсүп, 33 млн доллардан 44,6 млн долларга жеткен.
Алдыдагы форум эки тараптуу экономикалык кызматташууну дагы да тереңдетүүгө өбөлгө түзөрү күтүлүүдө.
