Өкмөт 2030-жылга чейин улуттук өнүктүрүү программасын сунуштады
Жогорку Кеңештин пленардык жыйынында Министрлер Кабинетинин Төрагасы Адылбек Касымалиев 2026-жылга карата бюджеттин негизги параметрлери жана бюджеттик сектордогу эмгек акынын масштабдуу түрдө жогорулатуу планы менен тааныштырды.
Ал белгилегендей, 2026-жылдын 1-апрелинен тарта мугалимдердин, дарыгерлердин, социалдык коргоо, маданият, спорт кызматкерлеринин жана техникалык персоналдын эмгек акысы 50%дан кем эмес көтөрүлөт. 1-сентябрдан тарта мамлекеттик жана муниципалдык кызматкерлерге, ошондой эле күч түзүмдөрүнүн жарандык кызматкерлерине кошумча төлөмдөр 50%га чейин көбөйтүлөт.
Ошондой эле Министрлер Кабинети Кыргызстанды 2030-жылга чейин өнүктүрүүнүн улуттук программасын сунуштап, максаттар катары:
- жан башына ИДП – 4 500 доллар,
- ИДПнын жалпы көлөмү – 30 млрд доллардан ашык,
- экономиканын орточо жылдык өсүү темпи – 8%,
- туруктуу өнүгүү боюнча дүйнөнүн алдыңкы 30 өлкөсүнүн катарына кирүү белгиленди.
Пленардык жыйындын жыйынтыгы боюнча 2024-жылга бюджеттин аткарылышы, 2025-жылга бюджетке өзгөртүүлөр жана 2026–2028-жылдарга пландалган бюджет долбоорлору кабыл алынды.
