А.Касымалиев Бишкектеги инвестициялык долбоорлордун жүрүшү менен таанышты
Министрлер Кабинетинин Төрагасы Адылбек Касымалиев Бишкек шаарында ишке ашырылып жаткан ишкерликке багытталган долбоорлордун жана энергетикалык объекттердин курулушунун жүрүшү менен таанышты. Бул тууралуу Өкмөттүн басма сөз кызматынан билдиришти.
Иш сапардын алкагында МинКаб Төрагасы Н.Исанов көчөсү менен Чүй проспектисинин кесилишинде жайгашкан реконструкцияланган заманбап кеңсе борборуна барды. Вьетнамдык “Rox Group” компаниясынын директорлор кеңешинин төрагасы Чан Ань Туан бизнес-борбордун функционалдык мүмкүнчүлүктөрү жана борбор калаанын бизнес потенциалын өнүктүрүүдөгү мааниси тууралуу маалымат берди.
Андан соң Адылбек Касымалиев Бишкек шаардык мэриясынын “Бишкексельмаш” отканасынын реконструкциясынын биринчи этабынын жыйынтыгы менен таанышты. Шаар мэри Айбек Жунушалиев объект заманбап жабдуулар менен жаңыртылып, жылуулуктун натыйжалуулугу жана ишенимдүүлүгү кыйла жогорулаганын белгиледи.
Ошондой эле МинКаб Төрагасы “Rox Group” компаниясы ишке ашырып жаткан “Royal Central Park” ири инвестициялык долбоорунун курулушунун жүрүшү менен таанышты. Долбоор турак жай жана көп функционалдуу комплекс катары иштелип чыккан.
Иш сапардын жыйынтыгында Адылбек Касымалиев ири курулуштарды жүргүзүүдө сапат жана экологиялык стандарттарды сактоонун маанилүүлүгүн белгилеп, инвестициялык долбоорлорду ыкчам колдоо боюнча тиешелүү мамлекеттик жана шаардык органдарга бир катар тапшырмаларды берди.
