Балык чарбасына тоют жеткирүүдө кошумча нарк салыгы алынбайт
Министрлер Кабинети "Кыргыз Республикасында азык-түлүк коопсуздугун камсыз кылуу жана рыноктук бааларды турукташтыруу боюнча чаралар жөнүндө" токтомуна өзгөртүүлөрдү киргизди. Тиешелүү чечимге Министрлер Кабинетинин Төрагасы Адылбек Касымалиев кол койду.
Документтин максаты — ата мекендик өндүрүүчүлөрдү колдоо, өлкөнүн азык-түлүк коопсуздугун камсыз кылуу жана ички рыноктун туруктуулугун сактоо, ошондой эле продукциянын сапатын жогорулатуу.
Мындан ары 2027-жылдын 31-декабрына чейин айыл чарба балыгы үчүн тоюттун салык салынуучу жеткирүүлөрүнө кошумча нарк салыгынын ставкасы 0% деп белгиленди. Бул ТЭИ ТН 2309 90 1000, 2309 90 3100, 2309 90 9609 товардык позицияларына тиешелүү. Тоют өндүрүүчү айыл чарба балыгын өстүрүү ишин жүзөгө ашырган айыл чарба өндүрүүчүнүн дарегине жеткирилет.
