Кыргызстанда эмгек миграциясына быйыл 52 миң адамга квота бекитилди
Кыргызстанда 2026-жылга карата эмгек миграциясына квота 52 миң адам болуп бекитилгенин Эмгек, социалдык камсыздоо жана миграция министрлигинин чет өлкөлүк жарандар менен иштөө бөлүмүнүн башчысы Арлен Алиясов билдирди.
Анын айтымында, өткөн жылы алгач квота 25 миң болуп белгиленип, кийин 42 миңге, андан соң 52 миңге чейин көбөйтүлгөн. Зарылчылык жаралса, бул көрсөткүч дагы жогорулатылышы мүмкүн.
"2025-жылы ишмердүүлүктүн түрлөрүн токтомдон алып салууну чечтик, анткени ар бир өзгөртүүдө кайрадан түзөтүү киргизүүгө туура келет. Адатта эң көп суроо-талап курулуш жана жеңил өнөр жай тармактарына болот", — деди Арлен Алиясов.
Ал кошумчалагандай, Кыргызстанда иштөөнү каалагандардын арасында Кытай, Индия, Түркия, Пакистан жана башка өлкөлөрдүн жарандары бар.
Бөлүм башчы 2025-жылдын 1-январынан тартып чет өлкөлүк жарандарга уруксат берүү тартиби өзгөргөнүн эске салды. Пилоттук долбоордун алкагында бардык документтер "бирдиктүү терезе" принциби аркылуу электрондук порталдан кабыл алынууда. Эмгек квотасын бөлүштүрүү жана иштөөгө уруксат берүү функциялары министрликтен Тышкы иштер министрлигине өткөрүлүп берилген.
Пилоттук долбоор 2026-жылдын 1-июлуна чейин уланат. Эгер жыйынтыгы оң болсо, Кыргызстандын мыйзамдарына тиешелүү өзгөртүүлөр киргизилет.
