Быйыл айыл чарба каттоосу толугу менен электрондук форматка өткөрүлөт
Министрлер Кабинетинин Төрагасынын орун басары, Суу ресурстары, айыл чарба жана кайра иштетүү өнөр жайы министри Бакыт Төрөбаев айыл чарба каттоосун өткөрүүгө даярдык маселелерине арналган Республикалык комиссиянын жыйынын өткөрдү. Бул тууралуу Өкмөттүн басма сөз кызматынан билдиришти.
Жыйында КР Улуттук статистика комитетинин төрагасы Бактыбек Кудайбергенов каттоо толугу менен электрондук форматта өтөрүн маалымдап, маалыматтар каттоочулардын мобилдик тиркемелери аркылуу чогултулуп, Улутстаткомдун борбордук серверине корголгон байланыш каналдары аркылуу жөнөтүлөрүн билдирди. Бул маалыматтардын купуялуулугун жана ыкчам иштетилишин камсыз кылат.
Маалымат жыйынында каттоого карата бир катар даярдык иштери аткарылганы белгиленди. Каттоо формалары тиешелүү ведомстволор жана БУУнун Азык-түлүк жана айыл чарба уюму менен макулдашылып, 2024-жылы өткөрүлгөн пилоттук каттоонун жыйынтыгынын негизинде методология жана программалык камсыздоо жакшыртылган. Ошондой эле 2025–2026-жылдары персоналды даярдоонун көп баскычтуу системасы ишке ашырылып, биринчи этапта 200дөн ашык адис окутулган.
Республика боюнча каттоого 6 791 убактылуу кызматкер тартылат. Алардын ичинде регистраторлор, каттоочулар, инструктор-контролерлор жана координаторлор бар. Персоналды тартуу графигине ылайык, координаторлор февраль айында, ал эми негизги кызматкерлер март–апрель айларында ишке киришет.
Жыйындын соңунда Бакыт Төрөбаев айыл чарба каттоосу өлкөнүн азык-түлүк коопсуздугун камсыз кылуу жана фермерлерди колдоого багытталган мамлекеттик программаларды так пландаштыруу үчүн маанилүү экенин белгилеп, мамлекеттик жана жергиликтүү бийлик органдары каттоону уюштурууга жеке жоопкерчиликтүү экенин баса көрсөттү.
Белгилей кетсек, Министрлер Кабинетинин чечимине ылайык, айыл чарба каттоосу 2026-жылдын 20-мартынан 10-апрелине чейин өткөрүлөт.
