Эмгекчил айылында логистикалык борбор курулат
Суу ресурстары, айыл чарба жана кайра иштетүү өнөр жайы министри Эрлист Акунбеков иш сапарынын алкагында Нарын районунун Эмгекчил айылында жайгашкан мурдагы жарандык коргонуу объектисинин абалы менен таанышты.
Министрликтен билдиришкендей, бүгүнкү күндө президенттин Нарын облусундагы өкүлүнүн демилгеси менен аталган жайда логистикалык борбор түзүү долбоору каралып жатат.
Долбоорду ишке ашыруу аймактагы айыл чарба продукцияларын сактоо, кайра иштетүү жана жеткирүү мүмкүнчүлүктөрүн кеңейтүүгө багытталган.
Белгилей кетсек, аталган имарат 1987-1989-жылдары курулган, жалпы аянты 10 миң чарчы метрди түзөт. 640 адамга ылайыкталган бул объект 44 бөлмөдөн турат, анын ичинде 4 587 чарчы метрлик жертөлө жайлары бар. Учурда имараттын ички түзүмү бузулуп, бир катар бөлмөлөр жараксыз абалга келген.
Мурда Нарын жана Ысык-Көл облустары бириккен мезгилде объекттеги инвентарлар Балыкчы шаарына көчүрүлүп кеткен. Натыйжада объект узак убакыттан бери пайдаланылбай келген.
