Нарындагы бала бакчада "жасалма жумушчулар" табылды
Нарында мамлекеттик мекемеге адамдарды жасалма түрдө жумушка орноштуруу фактылары аныкталганын УКМКнин басма сөз кызматы билдирди.
Тергөөнүн версиясы боюнча, 2024-жылдын башында Куланак айылынын тургундары О.А.О. жана Т.у.А. ошол эле айылдагы "Тангабийке-Бердике" балдар бакчасына жумушка кабыл алынган. Бирок алар жумушка алынгандан тартып өз милдеттерин аткарышкан эмес жана узак убакытка айылдан чыгып кетип турушкан.
Бул факт Кылмыш-жаза кодексинин 210-беренесинин 2-бөлүгүнүн 4-пункту ("Ишенилип берилген мүлктү ыйгарып алуу же коротуу") боюнча катталган. Тергөө алкагында бул фактылар тастыкталып, ошондой эле алар иш убактысын эсепке алуу табелин жасалма толтуруу аркылуу айлык акыларын үзгүлтүксүз алып турушканы аныкталган.
Белгилүү болгондой, балдар бакчанын директору Т.Т.Э. күнөөсүн моюнга алып, 750 миң сом өлчөмүндө зыянды төлөп берген.
