Садыр Жапаров ата мекендик учкучсуз учуучу аппараттарды чыгарууну тапшырды
Бүгүн Президент Садыр Жапаров “Дастан” трансулуттук корпорациясы ачык акционердик коомунун ишмердүүлүгү менен таанышты. Бул тууралуу Президенттин Администрациясынан билдиришти.
Мамлекет башчысы иш сапарынын алкагында ишкананын өндүрүштүк кубаттуулугун, анын ичинде атайын продукцияларды чыгаруу боюнча иштеп жаткан линияларды көрүп чыкты. Белгилүү болгондой, заводдун негизги багыттарынын бири деңиз торпедалык куралдарын даярдоо болуп саналат.
Иш сапардын жүрүшүндө ишкананы мындан ары өнүктүрүү жана модернизациялоо маселелерине өзгөчө көңүл бурулду. Президент Садыр Жапаров заманбап технологияларды активдүү киргизүүнүн жана ата мекендик продукциянын атаандаштыкка жөндөмдүүлүгүн жогорулатуунун маанилүүлүгүн белгиледи.
Мындан тышкары, Мамлекет башчысы тиешелүү мамлекеттик органдарга жана ишкананын жетекчилигине ата мекендик учкучсуз учуучу аппараттарды чыгарып баштоону уюштуруу тапшырмасын берди.
Бул демилге өлкөнүн коргонуу-өнөр жай потенциалын чыңдоого, жогорку технологиялык тармактарды өнүктүрүүгө жана импорттук продукцияга көз карандылыкты азайтууга багытталган.
