Зергерчилик тармагында көмүскө жүгүртүү азайып, бюджетке түшкөн салык көбөйдү
Зергерчилик тармагына берилген жеңилдиктердин натыйжасында көмүскө жүгүртүү азайып, бюджетке түшкөн салык көбөйдү. Бул тууралуу Мамлекеттик салык кызматынын төрагасы Алмамбет Шыкмаматов билдирди.
Анын айтымында, буга чейин баалуу металлдар тармагы Финансы министрлигинин курамында болгон. Кийин тармак Мамлекеттик салык кызматына өткөрүлүп берилип, аны өнүктүрүү боюнча бир катар милдеттер коюлган.
“Кыргызстанда зергерчилик үчүн керектүү алтын өзүбүздө өндүрүлгөнү менен, көпчүлүк учурда чийки зат катары экспорттолуп келген. Ошол эле учурда Түркия жана Тайвань сыяктуу өлкөлөрдөн даяр зер буюмдары импорттолуп жаткан. Бул жагдайды өзгөртүү максатында президент тарабынан тармакты өнүктүрүүгө багытталган атайын Жарлык кабыл алынган”, — деди Алмамбет Шыкмаматов.
Жарлыкка ылайык, зергерлерге алтын дүйнөлүк рыноктогу баадан (Лондон фиксингинен) 2 %га арзан бериле баштаган. Мындан тышкары, алтын үчүн төлөмдү 6 айдан кийин жүргүзүү мүмкүнчүлүгү түзүлгөн. Бул чара зергерлерди насыя алып, кошумча пайыз төлөөдөн бошотууга багытталган.
Алмамбет Шыкмаматов ошондой эле жабдууларды жаңыртуу жана адистерди окутуу үчүн 6 % менен жеңилдетилген кредиттер каралып, салык ставкасы 0,25 % деңгээлине чейин төмөндөтүлгөнүн белгиледи.
“Натыйжада тармакта олуттуу өзгөрүүлөр байкалууда. Көмүскөдө жүргөн болжол менен 16 млрд сомдук алтын ачыкка чыгып, зергерлер расмий иштей баштады. Учурда тармак бюджетке 100 млн сомго жакын салык төлөп жатат”, — деди ал.
Эскерте кетсек, бул өзгөртүүлөр КРнын 2025-жылдын 31-декабрындагы «Салык салуу, социалдык камсыздандыруу жана салыктык эмес кирешелер чөйрөсүндө КРнын айрым мыйзам актыларына өзгөртүүлөрдү киргизүү жөнүндө» Мыйзамына ылайык киргизилген.
