Жогорку Кеңештин мурдагы депутаты Өмүрзак Мамаюсупов каза болду
Белгилүү мамлекеттик жана коомдук ишмер, окумуштуу, Жогорку Кеңештин мурдагы депутаты Өмүрзак Мамаюсупов каза болду. Бул тууралуу анын жакындары кабарлашты.
Өмүрзак Мамаюсупов 1973-жылы Ош мамлекеттик педагогикалык институтунун физика-математика факультетин артыкчылык диплому менен аяктаган. 1984-жылы Новосибирск мамлекеттик университетинин аспирантурасын, ал эми 1999-жылы Кыргыз мамлекеттик улуттук университетинин магистратурасын ийгиликтүү бүтүргөн.
Эмгек жолун мектеп мугалими болуп баштап, кийин Улуттук илимдер академиясында улук илимий кызматкер болуп эмгектенген. Ал 40тан ашык илимий эмгектин автору.
1995–2000-жылдары Жогорку Кеңештин депутаты катары тармактык комитеттин төрагасы болуп иштеген.
1999-жылы билим берүү министринин биринчи орун басары болгон.
2000–2001-жылдары Президенттин Жогорку Кеңештеги ыйгарым укуктуу өкүлү болгон.
2001–2006-жылдары Дин иштери боюнча мамлекеттик комиссиясын жетектеген.
“Кыргыз Республикасынын Эмгек Баатыры”, “Даңк” медалы менен сыйланып, “Кыргыз Республикасынын эмгек сиңирген мугалими” ардак наамына татыктуу болгон.
