Бишкекте мугалимдер күнүнө карата салтанаттуу иш-чара өттү
Бүгүн Токтогул Сатылганов атындагы Улуттук филармонияда Билим берүү кызматкерлеринин күнүнө арналган салтанаттуу иш-чара болуп өттү. Бул тууралуу мэриядан билдиришти.
Маалымдалгандай, иш-чарада Бишкек шаардык кеңешинин төрагасы Бекжан Усеналиев билим берүү тармагында үзүрлүү эмгектенген кызматкерлерге шаардык кеңештин сыйлыктарын тапшырды.
Усеналиев мугалимдерди кесиптик майрамы менен куттуктап, алардын эмгеги коомдун келечегин калыптандырууда өзгөчө мааниге ээ экенин белгиледи.
Салтанатка Агартуу министри Догдуркүл Кендирбаева, Илим жана жогорку билим берүү министри Гүлзат Исматова, Бишкек шаарынын мэри Айбек Джунушалиев жана мугалимдер катышты.
Иш-чарада билим берүү тармагынын мыктыларына сыйлыктар тапшырылып, "Жылдын мыкты мугалими - 2026" сынагынын жеңүүчүлөрү сыйланды. Майрам концерттик программа менен жыйынтыкталды.
