БУУ менен адам укуктары боюнча өнөктөштүк талкууланды
17-июнда Жогорку Кеңештин төрагасынын орун басары Жылдыз Таалайбек кызы БУУнун Адам укуктары боюнча Жогорку комиссарынын башкармалыгынын Борбордук Азия боюнча аймактык өкүлүнүн милдетин аткаруучу Эннио Боати менен жолугушту.
Парламенттин басма сөз кызматы билдиргендей, жолугушууда адам укуктарын коргоо, аялдарга жана балдарга карата зомбулуктун алдын алуу, гендердик теңчилик жана мамлекеттик органдардын ачык-айкындуулугун камсыз кылуу жаатындагы кызматташтык маселелери талкууланды.
Жылдыз Таалайбек кызы адам укуктарын жана негизги эркиндиктерди коргоо Кыргызстандын ички жана тышкы саясатындагы артыкчылыктуу багыттардын бири экенин белгиледи. Ал өлкө БУУ алдындагы эл аралык милдеттенмелерин аткарып, адам укуктары боюнча улуттук баяндамаларды үзгүлтүксүз тапшырып келерин айтты.
Ошондой эле жемкорлукка жана уюшкан кылмыштуулукка каршы күрөшүү, мамлекеттик органдардын ачыктыгын камсыз кылуу, жарандык коомду өнүктүрүү жана үй-бүлөлүк зомбулуктун алдын алуу боюнча иштер жүргүзүлүп жатканын кошумчалады.
Өз кезегинде Эннио Боати Кыргызстанды БУУнун Коопсуздук кеңешинин туруктуу эмес мүчөсү болуп шайланышы менен куттуктап, бул өлкө үчүн чоң жоопкерчилик экенин белгиледи. Ал ошондой эле адам укуктарын коргоо жаатындагы кызматташууну мындан ары да кеңейтүүгө кызыкдар экенин билдирди.
Жолугушуунун жүрүшүндө тараптар адам укуктары боюнча маалымдуулукту жогорулатуу, биргелешкен долбоорлорду ишке ашыруу жана консультациялык жолугушууларды өткөрүү маселелерин да талкуулашты.
с
