Кыргыз-түрк парламенттер аралык алакалар талкууланды
20-октябрда Жогорку Кеңештин төрагасы Марлен Маматалиев Түркиянын Улуу улуттук жыйынынын төрагасы Нуман Куртулмуш менен жолугушту. Бул тууралуу парламенттен маалымдады.
Билдирүүгө караганда, тараптар эки өлкөнүн ортосундагы саясий-экономикалык, маданий-гуманитардык кызматташтыкты өнүктүрүү жана парламенттер аралык алакаларды кеңейтүү маселелерин талкуулашты.
Төрага Маматалиев Түркия менен калыптанган кызматташтыкты өнүктүрүүгө кызыкдар экендигин белгилеп, алакаларды арттыруу жаатындагы ойлору менен бөлүштү.
Өз кезегинде Нуман Куртулмуш эки өлкө башчыларынын тыгыз алакасын парламенттик деңгээлде да жигердүү улантуу керектигин айтып, Жогорку Кеңештин төрагасын Түркияга расмий сапар менен келип кетүүгө чакырды.
Ошондой эле жолугушууда тараптар билим берүү тармагындагы байланыштарды бекемдөө боюнча сунуш-пикирлерин ортого салышты.
Белгилей өтсөк, жолугушуу Бишкек шаарында өткөн Түрк мамлекеттеринин Парламенттик ассамблеясынын (ТүркПА) кезектеги жыйындарынын алкагында уюштурулган.
