Күзөт кызматы президенттин карамагына өттү
Жогорку Кеңеш 17-июнда “Мамлекеттик чек араны коргоо жана мамлекеттик күзөт чөйрөсүндөгү айрым мыйзам актыларына өзгөртүүлөрдү киргизүү жөнүндө”мыйзам долбоорун биринчи окууда кабыл алды.
Маалыматка ылайык, өзгөртүүлөрдүн зарылдыгы УКМКнын Чек ара кызматын Мамлекеттик чек ара кызматына айландыруу, ошондой эле Мамлекеттик күзөт кызматын УКМКнын курамынан чыгарып, аны түздөн-түз өлкө президентине баш ийген өз алдынча орган катары түзүү менен байланыштуу.
Түзөтүүлөр менен бир катар мыйзамдарга жана кодекстерге, анын ичинде Жазык-процессуалдык кодексине, “Мамлекеттик чек ара жөнүндө”, “Улуттук коопсуздук органдары жөнүндө”, “Мамлекеттик күзөт жөнүндө”, “Ыкчам-издөө ишмердүүлүгү жөнүндө”, “Контрчалгындоо ишмердүүлүгү жөнүндө”, "Коргонуу жана Куралдуу күчтөр жөнүндө” мыйзамдарга, ошондой эле жалпы аскердик милдет жана аскердик кызмат жөнүндө мыйзамга өзгөртүүлөрдү киргизүү сунушталууда.
