Президент дипломаттарга жана авиаторлорго сыйлык тапшырды

Президент Садыр Жапаров 22-июнда, Ысык-Көл облусунун Чолпон-Ата шаарында мамлекеттик сыйлыктарды тапшыруу аземине катышты. Бул тууралуу президенттик админстрациянын маалыматтык саясат бөлүмүнөн билдиришти.

Маалыматка ылайык, Мамлекет башчысы Кыргызстандын эл аралык аренадагы позициясын бекемдөөгө олуттуу салым кошкон дипломаттарды жана авиаторлорду сыйлады.

Президент иш-чарада сүйлөгөн сөзүндө Кыргызстан өзүнүн эгемендик тарыхындагы таасирдүү дипломатиялык жеңиштерди камсыздап, эл аралык коомчулуктун кызыгуусун арттырган тарыхый окуяны жаратканын баса белгиледи.

Маалым болгондой, 3-июнда Нью-Йоркто өткөн шайлоодо Кыргызстан биринчи жолу 2027–2028-жылдарга БУУнун Коопсуздук Кеңешинин Туруктуу эмес мүчөсү болуп шайланды. Ага удаа эле 20 жылдык чектөөдөн кийин Кыргызстан Европа Биримдигинин авиациялык коопсуздук боюнча тизмесинен, башкача айтканда, ЕБ “кара тизмесинен” расмий түрдө чыгарылды.

Мамлекет башчысынын Жарлыгына ылайык, 2027–2028-жылдарга Бириккен Улуттар Уюмунун Коопсуздук Кеңешинин туруктуу эмес мүчөлүгүнө шайланышына кошкон олуттуу салымы, эл аралык аренада улуттук кызыкчылыктарды илгерилетүү боюнча натыйжалуу иши үчүн сыйланат:

III даражадагы "Манас" ордени менен

Жээнбек Кулубаев – Тышкы иштер министри;

“Даңк” ордени менен:

Асеин Исаев – Тышкы иштер министринин биринчи орун басары;

Аида Касымалиева– Нью-Йорк шаарындагы Кыргызстандын Бириккен Улуттар Уюмундагы Туруктуу өкүлү;

“Ардак” медалы менен:

Мухамед Лоу – Кыргызстандын Эфиопия Федеративдик Демократиялык Республикасындагы элчилигинин кеӊешчиси;

Адылбек Тултемиров  – Кыргызстандын Эфиопия Федеративдик Демократиялык Республикасындагы Атайын жана Ыйгарым укуктуу элчиси;

Медер Өтөбаев – Нью-Йорк шаарындагы Кыргызстандын Бириккен Улуттар Уюмундагы Туруктуу өкүлчүлүгүнүн кеңешчиси.

Ошондой эле Садыр Жапаровдун тескемесине ылайык, бир катар адамдарга сыйлыктар тапшырылды.