Жаңы дайындалган башкы прокурор жамаатка тааныштырылды
1-июлда президент Садыр Жапаровдун тескемесине ылайык, Малик Бектургановго башкы прокурордун милдеттерин убактылуу аткаруу жүктөлдү. Бул тууралуу Башкы прокуратурадан билдиришти.
Маалыматка караганда, жаңы дайындалган жетекчини Башкы прокуратуранын эмгек жамаатына министрлер кабинетинин жетекчиси Адылбек Касымалиев тааныштырды.
Тааныштыруу учурунда А.Касымалиев, М. Бектургановдун укук коргоо органдарындагы көп жылдык үзүрлүү эмгек жолуна токтолуп, анын жогорку кесипкөйлүгүн, башкаруучулук тажрыйбасын жана прокуратура органдарындагы жооптуу кызматтарда топтогон бай иш тажрыйбасын белгиледи. Бул дайындоо мыйзамдуулукту чыңдоого, жарандардын укуктарын жана мыйзамдуу кызыкчылыктарын коргоону күчөтүүгө, ошондой эле прокуратура органдарынын ишинин натыйжалуулугун мындан ары дагы жогорулатууга өбөлгө түзөрүнө ишеним билдирди.
Өз сөзүндө М.Бектурганов ага көрсөтүлгөн жогорку ишеним үчүн А.Касымалиевге ыраазычылык билдирди. Ошондой эле ал мыйзамдуулуктун үстөмдүгүн камсыз кылуу, жарандардын, коомдун жана мамлекеттин мыйзам менен корголуучу укуктарын жана кызыкчылыктарын ишенимдүү коргоо, прокуратура органдарынын алдында турган милдеттерди так жана жоопкерчиликтүү аткаруу үчүн бардык күч-аракетин жумшай турганын белгиледи.
