Кыргызстанда экологиялык коопсуздук боюнча жаңы чаралар кабыл алынды
Министрлер кабинети өлкөнүн химиялык жана экологиялык коопсуздугун чыңдоо, айлана-чөйрөнү коргоо жана калктын ден соолугун сактоо багытындагы эки документти кабыл алды. Бул тууралуу Жаратылыш ресурстары, экология жана техникалык көзөмөл министрлиги билдирди.
Алардын бири — 2026–2030-жылдарга Туруктуу органикалык булгоочу заттар жөнүндө Стокгольм конвенциясын аткаруу боюнча иш-аракеттер планы. Аталган план Министрлер кабинетинин 24-июлдагы №562-т тескемеси менен бекитилди.
Документ туруктуу органикалык булгоочу заттардын адамдын ден соолугуна жана айлана-чөйрөгө тийгизген терс таасирин азайтууга, аларды экологиялык жактан коопсуз башкарууга, мамлекеттик көзөмөлдү жана мониторингди күчөтүүгө багытталган.
Экинчи документ — 2026–2030-жылдарга химиялык, биологиялык, радиациялык жана ядролук коопсуздук боюнча Улуттук иш-аракеттер планы. Бул план өкмөттүн №474-т тескемеси менен бекитилди.
Аталган документ химиялык, биологиялык, радиациялык жана ядролук тобокелдиктерди азайтуу, өзгөчө кырдаалдардын алдын алуу жана аларга даярдыкты жогорулатуу, ошондой эле мамлекеттик органдардын өз ара аракеттенүүсүн күчөтүү максатында иштелип чыккан.
Жаратылыш ресурстары, экология жана техникалык көзөмөл министрлиги бул документтердин алкагында мамлекеттик органдар, эл аралык өнөктөштөр, илимий мекемелер жана жарандык коом менен биргеликте иш алып барып, белгиленген чаралардын сапаттуу аткарылышын камсыздайт.
Бул чечимдер Кыргызстандын экологиялык коопсуздугун чыңдоого, химиялык заттарды жана калдыктарды коопсуз башкаруу системасын жакшыртууга, ошондой эле калктын ден соолугун коргоого багытталган маанилүү кадам экени белгиленди.
