Жарандык активист Азамат Баяманов камакка алынды
Бишкектин Биринчи май райондук соту социалдык тармактарда бийликти сындаган пикирлери менен таанылган активист Азамат Баямановду эки айга камакка алды. Бул тууралуу анын жакындары билдиришти.
Райондук соттун маалыматына ылайык, Баяманов 25-сентябрга чейин Жазаларды аткаруу мамлекеттик кызматынын №21 тергөө абагына камалды. Баяманов Кылмыш-жаза кодексинин 278-беренесинин биринчи бөлүгүнүн негизинде массалык башаламандыктарды уюштурууга шектелүүдө.
Баяманов 22-июлда Улуттук коопсуздук боюнча мамлекеттик комитетке чакырылганын, 23-июлда мекемеге кирип чыкканын өзүнүн социалдык баракчасына жарыялаган.
