Сарымсак өстүрүү тармагын өнүктүрүү боюнча үч тараптуу келишим түзүлдү
Кыргызстан менен Орусия сарымсак өстүрүү тармагындагы кызматташтыкты кеңейтүү боюнча үч тараптуу келишимге кол коюшту. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Маалыматка ылайык, келишимге министрлик, Орусиянын Сарымсак өстүрүүчүлөрүнүн улуттук союзу жана "Жашылча жана бакча өсүмдүктөрү" кластери кол койду.
Документ заманбап технологияларды киргизүүгө, фермерлерди окутууга, кайра иштетүүнү өнүктүрүүгө жана өндүрүмдү ички жана тышкы рынокко чыгарууга багытталган.
Жолугушууга министрдин орун басары Мирбек Дүйшеев, орусиялык жана кыргызстандык тармактык уюмдардын өкүлдөрү, ошондой эле айыл чарба өндүрүүчүлөрү жана кайра иштетүүчү ишканалардын өкүлдөрү катышты.
Мындан сырткары, тараптар жолугушууда сапаттуу үрөндүк материалдарды колдонуу, заманбап агротехнологияларды жайылтуу, сарымсакты кайра иштетүү, сактоо жана логистиканы жакшыртуу маселелерин да талкуулашты.
