Жээнбек Кулубаев АКШнын өкүлү менен санкция жана виза маселелерин талкуулады
Тышкы иштер министри Жээнбек Кулубаев АКШнын Мамлекеттик катчысынын Түштүк жана Борбордук Азия иштери боюнча жардамчысы Пол Капурду кабыл алды. Бул тууралуу ТИМдин басма сөз кызматы билдирди.
Маалыматка ылайык, жолугушууда тараптар эки өлкөнүн мамилелеринин учурдагы абалын жана эки тараптуу кызматташтыкты мындан ары өнүктүрүү маселелерин талкуулашты.
Ошондой эле санкция маселелери, визалык жол-жоболор жана визалык кепилдик төлөмдөрүн киргизүүгө байланыштуу маселелер боюнча пикир алмашуу болду.
Америкалык тарап эл аралык жана аймактык маселелер боюнча тыгыз кызматташууга даяр экенин билдирди.
Жолугушуунун соңунда алдыдагы байланыштарды жана эки тараптуу иш-чаралардын тартибин талкуулашты. Ошондой эле саясий диалогду улантып, кыргыз-америка мамилелерин мындан ары бекемдөөгө кызыкдар экенин ырасташты.
