Жогорку Кеңеште шайлоо мыйзамдарын өркүндөтүү боюнча брифинг өттү
10-августта Жогорку Кеңеште шайлоо мыйзамдарын өркүндөтүүгө арналган эксперттик брифинг өттү. Бул тууралуу парламенттин басма сөз кызматы билдирди.
Маалыматка ылайык, Иш-чарада ЕККУнун Демократиялык институттар жана адам укуктары боюнча бюросунун сунуштары, эл аралык стандарттар жана аларды ишке ашыруу механизмдери талкууланды.
Анда шайлоонун ачык-айкындуулугун жогорулатуу, каржылык маслелер, санариптик технологияларды колдонуу жана комиссиялардын ишин жакшыртуу маселелери көтөрүлдү.
Европадагы коопсуздук жана кызматташтык уюмунун өкүлдөрү эл аралык шайлоо стандарттары жана байкоо жүргүзүү ыкмасы тууралуу маалымат жана сунуштарды беришти.
Талкууда саясий жемкорлукту азайтуу жана шайлоону каржылоо тартибин күчөтүү маселелерине да көңүл бурулду.
Ошондой эле көп мандаттуу шайлоо округдарын киргизүү, гендердик квотаны сактоо жана аралыктан добуш берүү мүмкүнчүлүгүн түзүү боюнча пикирлер айтылды.
