Улуттук госпиталга 68 млн сомдук жабдуу берилди, операция саны 2 эсе көбөйөт
Бүгүн Саламаттык сактоо министринин орун басары Нурбек Букуев Sharjah Charity International жана "Ихсан-Хайрия" фонддорунун өкүлдөрү менен жолугушту. Бул тууралуу министрликтен билдиришти.
Маалыматка ылайык, жолугушууда Улуттук госпиталдын №1 көз микрохирургия бөлүмүнө заманбап жабдууларды өткөрүп берүү талкууланды. Демилге 2024-жылы Шарджа Эмиратынын Эмиринин орун басары шейх Султан бин Ахмад аль-Касиминин сапарында көтөрүлгөн.
Долбоор ишке ашып, 2026-жылдын башында бөлүмгө жалпы 68 млн 144 миң 792 сомдук жабдуу жеткирилип орнотулду.Берилген жабдуулардын катарында тонометр, периметр, Meridian MKQ SLT лазердик системасы, томограф, операциялык микроскоп, фундус-камера, УЗИ аппараты, биометр жана катарактага каршы аппараттар бар.
Улуттук госпиталдын маалыматы боюнча, азыр бөлүмдө жылына 1 500 - 1 800 операция жасалат. Жаңы жабдуулар менен бул көрсөткүчтү 3 000 - 3 500гө чейин жеткирүүгө болот.
Мындан тышкары, кызматташтыктын алкагында Аламүдүн районунун Октябрь айылында 23 млн 636 миң 841 сомго үй-бүлөлүк дарыгерлер тобунун имараты курулуп берилди.
