Бишкекте ТүркПАнын кезектеги жыйыны өтүп жатат
Бүгүн Бишкек шаарындагы “Ырыс-Ордо” конгресс-холунда Түрк мамлекеттеринин Парламенттик ассамблеясынын (ТүркПА) кезектеги жыйындары башталды. Алгач мүчө мамлекеттердин парламент жетекчилери Ассамблеянын Кеңешинин отурумуна чогулуп, төрагалыкты өткөрүп берүү аземи өттү.
Жогорку Кеңештин басма сөз кызматынын билдирүүсунө караганда, Ассамблеяга төрагалык кылуу кезеги Казакстандан - Кыргызстанга берилип, коңшу өлкөнүн Курултайынын Төрагасы Айбек Дадебай Жогорку Кеңештин Төрагасы Марлен Маматалиевге символикалык балканы тапшырды.
Кеңештин жыйыны кыргыз тараптын төрагалыгында уланып, Марлен Маматалиев алдыда жасала турган иштер тууралуу кеңири баяндама жасады.
“Дүйнөдө геосаясий жана экономикалык өзгөрүүлөр тездеп, транспорттук коридорлордун, энергетикалык жана азык-түлүк коопсуздугунун мааниси артууда. Мындай шартта түрк мамлекеттеринин өз ара ишенимге жана жалпы кызыкчылыктарга негизделген кызматташтыгын өнүктүрүү зарыл”, – деди Марлен Маматалиев өз сөзүндө.
Ассамблеяга мүчө өлкөлөрдүн парламент жетекчилери да сөз сүйлөп, кызматташтыкты арттыруу жаатындагы сунуштарын айтышты. Мындан сырткары ХV пленардык жыйынын күн тартибине киргизилген маселелер талкууланды.
Кеңештин отурумуна - Жогорку Кеңештин Төрагасы Марлен Маматалиев, Азербайжандын Милли Межлисинин Төрайымы Сагиба Гафарова, Казакстандын Курултайынын Төрагасы Айбек Дадебай жана Түркиянын Улуу Улуттук Жыйынынын Төрагасы Нуман Куртулмуш катышууда.
