Бизнес чөйрөсү накталай эмес сатуудагы салыктын нөлдүк ставкасын узартууну суранууда - ЭИК
Накталай эмес төлөмдөрдү стимулдаштыруу жана формалдуу эмес экономиканын деңгээлин төмөндөтүү үчүн накталай эмес төлөмдөр боюнча сатуудан алынуучу салыктын нөлдүк ставкасын узартуу зарыл, анткени ал 2023-жылдан тартып күчүн жоготот. Бул тууралуу Эл аралык ишкерлер кеңешинин (ЭИК) жетекчиси Аскар Сыдыков инвестициялык кеңештин жыйынында билдирди.
Мындан тышкары, Аскар Сыдыков Салык кодексине өзгөртүү киргизүүдө аны ачык кароого чакырды. Ошондой эле ал премьер-министрдин катышуусунда өзүнчө жыйын өткөрүп, бизнес-өкүлдөрүнүн сунуштарын талкуулап, мүмкүн болушунча аларды эске алууну сунуштады.
ЭИК ошондой эле жылына бир жолу гана Салык кодексине өзгөртүүлөрдү киргизүү боюнча чектөөлөрдү алып салуу керектигин белгиледи.
«Бизнес Салык кодексиндеги көйгөйлүү маселелер чечилмейинче айлап же жылдап күтө албайт. Мисалы, коомдук тамактануу жана туризм салыктын кыскарышын көп айдан бери күтүп келе жатат. Зарылчылыкка жараша Салык кодексине өзгөртүүлөр киргизилиши керек”, – дейт Сыдыков.
Ошондой эле жыйында чет өлкөдөн сатылып алынган кызмат көрсөтүүлөргө кошумча нарк салыгы (КНС), суусундуктарга коюлган акциздик салык маселеси козголду. Ишкерлер бул акциздик салык азыркыдай бардык сергитүүчү жана алкоголсуз суусундуктарга эмес, энергетикалык суусундуктарга гана салынышы керек деп эсептешет. Болбосо, мындай суусундуктарды өндүрүүчүлөрдүн укуктары бузулуп, андан аркы өндүрүшкө көп миллиондогон инвестиция салууга коркунуч келиши мүмкүн.
