Кыргызстанда инвесторлордун мамлекеттик органдарга карата нааразычылыгын жана аракетсиздигине даттанууларын кароо механизми киргизилүүдө. Бул тууралуу Инвестиция агенттигинин маалымат кызматы билдирди.

Маалым болгондой, президентке караштуу Инвестициялар агенттиги инвесторлордун укуктарын коргоо боюнча негизги мамлекеттик орган болуп аныкталып, башка мамлекеттик органдардын аракеттерине жана аракетсиздигине инвесторлордун даттанууларын кароо механизмин ишке киргизип жатат.

Бул тартипке ылайык, ар бир инвестор өзүнүн укуктарын коргоо үчүн инвестициялык агенттикке кайрыла алат, ал жерде анын даттануусу Инвесторлордун даттанууларынын реестрине киргизилип, дыкат каралат жана КРнын мамлекеттик жана муниципалдык органдары менен маселелерди чечүүдө ар тараптуу жардам көрсөтүлөт.

Инвесторлор менен алар нааразы болгон субъекттердин ортосундагы пикир келишпестиктерди аныктоо, жагдайларды чечүүгө көмөк көрсөтүү, ошондой эле Кыргызстандагы инвестициялык климатты жакшыртууга багытталган биргелешкен иш-чараларды өткөрүү максатында агенттик инвесторлорго туруктуу негизде колдоо көрсөтмөкчү.

Аталган агенттик өлкө ичиндеги абийирдүү чет элдик инвесторлордун демилгелерин жана долбоорлорун ар тараптуу колдоорун жана аларды мындан ары ишке ашырууга максималдуу жардам көрсөтүүгө даяр экенин баса белгиледи.

• Арыз даттануулар mail@invest.gov.kg электрондук дарегине жазуу түрүндө кабыл алынат. Сурап ​​билүү телефону: +996 312 30 02 31