Туруктуу кышкы туризм (WTK) долбоорунун катышуучулары: «Этномир» сувенир дүкөнү, «Дасторкон» кафеси, «А4» муз тебүүчү аянтчасы жана «Жаркыра» тазалоо кызматы 50 миң долларга чейинки инвестицияга сунушталды. Бул тууралуу Accelerate Prosperity демилгесинин басма сөз кызматы билдирди.

“Кыргызстанда кышкы туризмди туруктуу өнүктүрүү” долбоору (WTK) Accelerate Prosperity менен биргеликте туризм бизнеси боюнча акселерациялык конкурс өткөрүп, инвестиция ала турган жеңүүчүлөрдү аныктады. Бул акселерация программасы Швейцария Өкмөтү тарабынан каржыланып, 8 жумага созулду.

Алгач бир ай бою Каракол шаарындагы кышкы жана жыл бою туристтик бизнестин өкүлдөрүнүн арасында акселерацияга катышуу үчүн тандоо өткөрүлдү. Тандалган катышуучуларды жеке бизнес-насаатчылар коштоп, дагы бир ай окутушту.

Акырында катышуучулар инвестициялык комитетке өздөрүнүн бизнес-пландарын сунуштап, тийиштүү экспертизадан өткөндөн кийин эң перспективдүү долбоорлор 50 миң долларга чейинки инвестицияга сунушталды. Жеңүүчүлөр болуп «Этномир» сувенир дүкөнү, «Дасторкон» кафеси, «А4» муз тебүүчү аянтчасы жана «Жаркыра» тазалоо кызматы тандалды.