Чакан бизнеске өкмөттөн баарынан мурда үч нерсе керек: акча, кредиттик кепилдиктер жана салык жеңилдиктери
Каржылоонун жетишсиздиги – өлкөдөгү чакан бизнестин өнүгүшүнө негизги тоскоолдук болуп саналат. Ага сурамжылоого катышкан ишкерлердин 60%ы муктаж. Алардын 31%ы мамлекет тарабынан финансылык колдоого муктаж экенин айтышкан.
Кыргызстандын Кепилдик фонду өлкөдөгү микро, кичи жана орто бизнес өкүлдөрү арасында сурамжылоо жүргүзгөн. Респонденттердин 60%ы бизнесин өнүктүрүү үчүн кошумча каржылоо керек экенин белгилешкен. Кээ бир ишкерлер финансы рыногунан керектүү каражаттарды тартууга даяр экенин, бирок аны менен бирге мамлекет тарабынан да жардамга муктаж экендигин айтышкан.
Респонденттердин 31%ы мамлекет тарабынан финансылык колдоого муктаж экенин айтышкан. Сурамжылоого катышкандардын 18%ы мамлекеттен кредиттик кепилдиктерди, ал эми 17%ы салыктык жеңилдиктерди күтүшөт, деп айтылат изилдөөдө.
Кыргызстандагы чакан жана орто бизнести каржылоонун негизги булагы болуп банктардын кредиттери саналат. Кепилдик фондунун сурамжылоосуна катышкан ишкерлердин дээрлик жарымы муну тастыкташкан. Фонд ошондой эле Кыргызстандагы чакан жана орто ишкерлер насыя алууда кандай негизги кыйынчылыктарга дуушар болуп жатышканын аныктады. Алардын арасына: кредиттер боюнча өтө жогору пайыздык чен, күрөөнүн жетишсиздиги же жоктугу, насыялар аз мөөнөткө берилиши кирет.
Кыргызстандагы чакан жана орто бизнестин абалын изилдөө Кепилдик фонду тарабынан 2022-жылдын 7-сентябрынан 28-сентябрына чейин жүргүзүлгөн. Сурамжылоого өлкөнүн кичи жана орто бизнесинин 722 өкүлү катышкан.
