Коргоо министрлигинин тик учагы альпинисттик лагерлерине туристтерди жеткирет
Туристтерди жана алардын жабдууларын альпинисттик лагерлерине жеткирүү Коргоо министрлигинин тик учагы менен ишке ашырылат. Бул Туризмди өнүктүрүүнү фондунун жардамы менен мүмкүн болду.
Маалыматка ылайык, акыркы жылдары туроператорлор бул максаттар үчүн жеке чет элдик компаниялардан тик учакты ижарага алып жүрүшкөн. Ал эми акыркы убакытка чейин Коргоо министрлигинин тик учагын мындай максаттар үчүн колдонуу мүмкүн эмес болчу, анткени мыйзам мындай кызмат көрсөтүүгө жол берген эмес.
Туризмди өнүктүрүү фондунун көмөгү менен жобого өзгөртүүлөр киргизилип, эми тик учактар туризм максатында колдонула алат.
Тик учак бир эле учурда бир нече милдеттерди чечет – альпинисттерди деңиз деңгээлинен 4400 метр бийиктиктеги базалык лагерге жана артка жеткирет, азык-түлүк, чатырларды жана жабдууларды алып келип, коопсуздукту камсыздайт.
