Бишкекте курулуш компанияларынын эсебинен жол салынат – 700 метрдин сметалык баасы 79 млн сом
Бишкекте биринчи жолу курулуш компанияларынын эсебинен жол салынып жатат. Бул маселени чечүү үчүн мэр Эмилбек Абдыкадыров шаардын түштүк зонасында объектилери бар курулуш ишканалардын өкүлдөрүн чогулткан. Бул тууралуу баш калаа башчысы пресс-тур учурунда билдирди.
Анын айтымында, Бишкектин түштүгүндө пайдаланууга берилген үйлөр бар, аларда эл жашайт.
«Алар кандайдыр бир жол менен жүрүш керек. Мен компанияларга жол курууну сунуштагам. Алар түшүнүп, макул болушту. Биз өз тарапыбыздан бардык долбоордук-сметалык документтерди даярдадык. Азыр Куттубаев көчөсүнүн уландысы болгон жолдун курулушу башталды», - деди ал.
Жолдун узундугу 700 метрди түзөт, жолду бөлүүчү тилке жана тротуарлар болот. Долбоордун жалпы баасы 79 млн сомду түзөт. Мэрия бул жолду Жукеева-Пудовкина көчөсү менен бириктирет.
