“Менин шаарым” тиркемеси аркылуу унаа токтотуучу жайлардын акысын төлөсө болот
Бишкек шаарынын мэриясы шаардыктар үчүн санариптик кызматтарды өнүктүрүү боюнча ишин улантууда. Бул тууралуу Бишкек шаардык мэриясынан билдиришти.
Маалыматка караганда, Бишкек шаарынын мэриясынын “Санариптик технологиялар борбору” муниципалдык ишканасы “Шаардык жол-транспорттук инфратүзүм” муниципалдык ишканасы менен биргеликте “Менин шаарым” мобилдик тиркемеси аркылуу муниципалдык унаа токтотуучу жайлардын акысын төлөө мүмкүнчүлүгүн ишке ашырды.
Төлөм жүргүзүү үчүн картадан же тизмеден унаа токтотуучу жайдын аймагын тандап, унаанын мамлекеттик номерин көрсөтүү жана төлөмдү ырастоо жетиштүү.
Унаа токтотуучу жайдын акысы саат 08:00дөн 20:00гө чейин 25 сомду түзөт. Белгилей кетсек, дем алыш жана майрам күндөрү муниципалдык унаа токтотуучу жайлар үчүн акы төлөнбөйт.
