Таластагы райондор аралык мамлекеттик санитардык-эпидемиологиялык көзөмөлдөө борборуна 405 миң сомдук жаңы эмеректер жана жабдуулар алынды. Долбоорду «Альянс Алтын» каржылаган. Бул тууралуу компаниянын басма сөз кызматы билдирди.

«Альянс Алтын» ишканасынын өкүлү Адилет Токторбаев билдиргендей, ишканага материалдык-техникалык базаны жакшыртууга колдоо көрсөтүү боюнча департаменттен расмий кайрылуу түшкөн. Буга байланыштуу керектүү жабдуулар менен камсыз кылуу чечими кабыл алынды.

Аталган борбордун жетекчиси Чолпон Сагындыкова көрсөтүлгөн жардам үчүн ыраазычылык билдирип, жаңыланган инфраструктуранын аркасында мекеме илимий иш-чараларды өткөрүүгө шарт түзөөрүн баса белгиледи.

«Биз бул жерде кызматкерлерибизди окута алабыз. Эгерде кооптуу жугуштуу оорулар аныкталса, кызматкерлерди 14 күнгө чейин обсервацияга алуу үчүн шарттары түзүлдү», - деди ал.

Борбордун жетекчиси тоо-кен ишканасы тарабынан үзгүлтүксүз колдоо көрсөтүлөрүн эске салды. 2024-жылы «Альянс Алтын» ишканасынын каражатына 875 миң сомго эмерек жана жабдуулар алынган.