Наманган облусундагы ишканалар кыргыз ишкерлеринин көңүлүн бурду
Кыргыз Республикасынын Өзбекстандагы соода өкүлү Уран Темирбеков Наманган облусуна сапар менен барды. Сапардын алкагында ал Наманган облусунун Соода-өнөр жай палатасынын жетекчилиги, “Наманган” эркин экономикалык аймагынын администрациясы жана аймактагы өнөр жай ишканалары менен жолугушууларды өткөрдү.
Экономика жана коммерция министрлигинин маалыматына ылайык, сапардын жүрүшүндө Темирбеков төмөнкү ишканалар менен таанышып, алардын ишмердүүлүгүн жеринен көрдү:
- “Paper Box Invest” ЖЧКсы – тамак-аш продукциялары үчүн сапаттуу таңгактарды чыгарат;
- “Innovation Trans Oil GD” ЖЧКсы – битум өндүрүү;
- таттуу үй шартында жасалган нан азыктарын чыгарган жеке компаниялар;
- жемиштерди кайра иштетүү жана кургатуу боюнча ишканалар;
- таңгактоочу пленка чыгаруучу завод – азык-түлүктөрдү жана товарларды таңгактоо үчүн жука түрмөк пленка чыгаруу менен алектенет.
Сүйлөшүүлөрдүн жыйынтыгында Наманган облусунун өкүлдөрү Кыргыз Республикасы менен активдүү соода-экономикалык кызматташууга даяр экенин билдиришти. Аймактык тарап Кыргызстан менен соода байланышын кеңейтүүгө ачык экенин баса белгиледи.
Бул сапар Кыргызстандын ишкер чөйрөсү үчүн жаңы мүмкүнчүлүктөрдү ачып, эки өлкөнүн соода жана инвестициялык байланыштарын күчөтүүгө өбөлгө түзөт.
