Илон Маск OpenAI компаниясынан 109,4 млрд доллар кенемте талап кылды
Илон Маск ChatGPT’нин артында турган OpenAI компаниясын сотко берип, 109,4 млрд долларга чейин кенемте талап кылганын Bloomberg жана башка америкалык медиалар маалым кылышты.
Масктын айтымында, ал OpenAI’дын негиздөөчүлөрүнүн бири катары компанияга алгачкы инвестицияларды жумшап, анын өнүгүшүнө салым кошконуна карабастан, компаниядагы үлүшүнөн мыйзамсыз ажыратылган. OpenAI бул айыптоолорду четке каккан.
Масктын эксперттери ал OpenAI’га 38 млн доллар инвестиция салганын, бул азыркы баа менен 65,5-109,4 млрд долларлык үлүшкө барабар экенин билдиришти. Мындан тышкары, ал Microsoft’тон 13-25 млрд доллар талап кылууда, анткени корпорация жасалма интеллекттен негизги пайданы көрдү деп эсептейт.
Доо арызында Маск компания алгачкы келишимди "одоно бузуу" деп атады: OpenAI 2015-жылы "адамзаттын жыргалчылыгы үчүн" коммерциялык эмес долбоор катары түзүлгөн, ал эми азыр, анын айтымында, ири бизнестин кызыкчылыгы үчүн иштеп жатат.
OpenAI болсо Маск өз убагында компанияны толук көзөмөлдөөнү талап кылганын, атүгүл аны Tesla менен бириктирүүнү сунуштаганын билдирди. Ошондой эле 2018-жылы компаниядан кеткенден кийин эми сот аркылуу өзүнүн xAI стартапына жана Grok чат-ботуна атаандаш болгон компанияны алсыратууга аракет кылып жатканын кошумчалады. Сот ишти жабуудан баш тартты: процесс апрель айында башталышы күтүлүүдө.
