Салык кызматы ишкерлерге накталай эмес төлөмдөрдү жеңилдетет
Бүгүн Мамлекеттик салык кызматы накталай эмес эсептешүүлөрдүн өнүгүшү жана бизнестин актуалдуу көйгөйлөрүн чечүү багытында жумушчу кеңешме өткөрдү. Бул тууралуу Салык кызматынан билдиришти.
Иш-чарага Салык кызматынын төрагасынын орун басарлары, Улуттук банк, Монополияга каршы жөнгө салуу кызматы, Экономика министрлиги, Банктар аралык процессинг борбору жана банктардын союзунун өкүлдөрү катышты.
Кеңешменин негизги максаты — ишкерлер үчүн накталай эмес төлөмдөрдү колдонууда көйгөйлөрдү азайтуу, эсептешүүлөрдүн коопсуздугун жана ыкчамдыгын камсыздоо, ошондой эле бизнес үчүн ачык жана тең шарттарды түзүү. Талкууда QR-коддор, электрондук капчыктар жана төлөм системаларын колдонууда кездешкен практикалык кыйынчылыктар каралды.
Катышуучулар накталай эмес эсептешүүлөрдү өнүктүрүүгө багытталган биргелешкен чечимдерди иштеп чыгууга даяр экенин билдиришти. Мамлекеттик салык кызматы бул багыттагы ишмердүүлүктү улантып, бизнес үчүн ыңгайлуу шарттарды түзүүгө жана ачык-айкын экономикага салым кошууга милдеттүү.
