Салык кызматы чакан жана орто бизнеске колдоону улантууда
Мамлекеттик салык кызматы чакан жана орто ишкердик субъекттерине карата рейддик салыктык көзөмөлдү жана контролдук сатып алууну 2026-жылдын 31-декабрына чейин убактылуу токтотту. Бул тууралуу Салык кызматынан билдиришти.
Бул чечим чакан жана орто бизнеске колдоо көрсөтүү, административдик басымды азайтуу жана жагымдуу иштөө шарттарын түзүү максатында кабыл алынды.
Токтотуу чарасы бирдиктүү салыктын 0 жана 0,5% ставкасы менен иштегендерге, патент негизинде иштегендерге, өзгөчө режимдеги соода зоналарында салык төлөгөндөргө жана тигүү же текстиль өндүрүшүндө 0,25% ставка менен иштегендерге тиешелүү. Бирок салык каттоосуз иштегендерге, даттануулар же тергөө органдарынын токтомдору бар субъекттерге, салыктарын төлөбөгөндөргө жана акциздик товарларды мыйзамсыз жүгүрткөндөргө бул токтотуу чаралары тиешелүү эмес.
Ошондой эле салык кызматы контролдук-кассалык машиналарды, эсеп-фактураларды, банк карталары, электрондук акчалар жана QR-коддорду колдонуу боюнча түшүндүрүү жана практикалык жардам көрсөтүүнү улантат. Бул чаралар чакан жана орто ишкердикти колдоо жана экономикалык шарттарды жакшыртуу максатында кабыл алынган.
