Таластагы "Султан" колбаса цехи жергиликтүү калкты жумуш менен камсыздоодо
Талас облусунун Манас районунун Үч-Коргон айылында жайгашкан "Султан" колбаса азыктарын өндүрүүчү цехи туруктуу иш алып барып, жергиликтүү тургундарды жумуш менен камсыз кылууда.
Маалыматка ылайык, учурда ишканада уй жана тоок этинен жасалган колбасанын 20га жакын түрү өндүрүлүп, продукция Кыргызстандын бардык аймактарына сатууга жөнөтүлүүдө. Өндүрүш санитардык талаптарга толук жооп берип, жергиликтүү чийки затты колдонуу менен жүргүзүлөт.
Цех чек арага жакын жайгашкан айылда иштеп, бүгүнкү күндө 20-25 жергиликтүү тургунду туруктуу жумуш орун менен камсыз кылып келет. Бул аймактагы социалдык-экономикалык абалды жакшыртууга өз салымын кошууда.
Учурда ишкананын жетекчилиги өндүрүштү кеңейтүү багытында иштерди жүргүзүүдө. Цехти кеңейтүү менен кошумча жумуш орундарын түзүү жана өндүрүш көлөмүн көбөйтүү пландалууда. Ишкерликти колдоо максатында мамлекет тарабынан арзан пайыздагы насыя берүү каралып, тиешелүү колдоо көрсөтүлүүдө.
