Кыргызстанда табигый жайма как өндүрүү кеңейип жатат
"Накта Как" жеке ишканасы мөмө пастиласын өндүрүүнү кеңейтип жатканын Суу ресурстары, айыл чарба жана кайра иштетүү өнөр жайы министрлигинин басма сөз кызматы билдирди.
Учурда компаниянын ассортиментинде 25тен ашык түрдөгү мөмө пастиласы бар. Өндүрүлгөн продукция жергиликтүү чийки заттан жасалып, ден соолукка пайдалуу жана табигый азыктарга коюлган заманбап талаптарга толук жооп берет. Ошондой эле рынокто туруктуу суроо-талапка ээ.
Ишкана жасалма кошулмаларсыз жана консерванттарды колдонбостон, таза, табигый жана экологиялык жактан коопсуз продукция чыгарууга багытталган.
Азыркы учурда ишкана Сокулук районунун аймагынан 100 чарчы метрлик өндүрүш цехин куруу үчүн жер тилкесин бөлүп берүү өтүнүчү менен министрликкке кайрылган.
"Бул жаңы жумуш орундарын түзүүгө жана айыл чарба продукциясын кайра иштетүү тармагында кошумча кошумча нарк (кошумча баа) жаратууга мүмкүндүк берет", — деп белгилешти ишканадан.
Маалыматка ылайык, ишканага көрсөтүлүп жаткан колдоо кайра иштетүү тармагын өнүктүрүүгө, экологиялык багыттагы өндүрүштөрдү колдоого жана өлкөнүн азык-түлүк коопсуздугун чыңдоого багытталган “30+20+10” долбоорунун алкагында ишке ашырылууда.
