Өткөн жылы кепилдиктердин 54%ы айыл чарба ишкерлерине берилген
2025-жылдын жыйынтыгы боюнча "Кепилдик фонд" ААКсы жалпы суммасы 3,79 млрд сомду түзгөн 1 656 кепилдик берди. Бул колдоонун натыйжасында ишкерлер 12,98 млрд сом өлчөмүндө кредиттик каражаттарды тартууга мүмкүнчүлүк алышты. Бул тууралуу фонддун маалымат кызматынан билдиришти.
Кепилдик колдоонун негизги бөлүгү айыл чарба тармагына туура келип, 894 кепилдик (54%) берилди. Бул багытта кепилдиктердин суммасы 384,3 млн сомду, тартылган кредиттердин көлөмү 1,2 млрд сомду түздү.
Транспорт тармагында 279 кепилдик (17%) берилип, 384,2 млн сом кепилдик аркылуу 1,25 млрд сом кредит тартылды. Соода тармагында 232 кепилдик (14%) берилген, кепилдиктердин суммасы 774,3 млн сом, тартылган кредиттердин көлөмү 2,52 млрд сом болду.
Ошондой эле туризм тармагындагы ишкерлерге 31 кепилдик берилди. Бул багытта кепилдиктердин суммасы 206,7 млн сомду, тартылган кредиттердин көлөмү 1,05 млрд сомду түздү.
