Каржы министрлиги Дүйнөлүк банк менен экология жана ишкерликти колдоону талкуулады
Финансы министринин орун басары Нурбек Акжолов Дүйнөлүк банктын өкүлдөрү менен биргелешкен долбоорлордун аткарылышы боюнча жумушчу жолугушуу өткөрдү. Бул тууралуу ведомстводон билдиришти.
Жолугушууда өлкөнүн социалдык-экономикалык туруктуу өнүгүүсүнө багытталган демилгелердин учурдагы абалы талкууланды. Негизги көңүл "Кыргыз Республикасында абанын сапатын жакшыртуу" жана "Микро-, чакан жана орто ишканалар үчүн туруктуу финансы рыногун өнүктүрүү" долбоорлоруна бурулду.
Нурбек Акжолов абанын сапатын жакшыртуу долбоорунун маанисин белгилеп, таза жылытуу технологияларын киргизүү үчүн кредиттик линияларды ишке киргизүү, коммерциялык банктар менен кызматташуу жана калкты маалыматтандыруу чаралары каралып жатканын айтты. Ошондой эле долбоорлордун жүрүшү жана 2026-жылга пландалган каржылоо көлөмдөрү тууралуу маалымат берилди.
Микро-, чакан жана орто ишканалар үчүн туруктуу финансы рыногун өнүктүрүү долбоорунун алкагында ишкерлердин каржылоого жеткиликтүүлүгүн кеңейтүү жана заманбап каржылык инструменттерди колдонуу маселелери талкууланды.
Дүйнөлүк банктын өкүлдөрү бул долбоорлор калктын жашоо сапатын жакшыртууда, экологиялык туруктуулукту бекемдөөдө жана ишкердикти өнүктүрүүдө маанилүү роль ойной турганын белгилешип, кызматташтыкты улантууга даяр экенин билдиришти.
Жолугушуунун жыйынтыгында тараптар Кыргыз Республикасынын туруктуу өнүгүүсүнө багытталган долбоорлорду натыйжалуу ишке ашыруу үчүн өнөктөштүктү чыңдоого кызыкдар экенин баса белгилешти.
