А. Шыкмаматов: Былтыр бизнеске салык жеңилдиктери кеңейтилди
Салык кызматынан билдиришкендей, 2025-жылы ведомствонун ишинин жыйынтыгы боюнча коллегиялык жыйында салык жүгүн азайтуу жана салык жеңилдиктерин кеңейтүү боюнча масштабдуу саясат жүргүзүлгөнү белгиленди.
Жыйында Салык кызматынын төрагасы Алмамбет Шыкмаматов белгилегендей, артыкчылыктуу тармактар катары айыл чарба өндүрүшү жана кайра иштетүү, IT-индустриясы, энергиянын кайра жаралуучу булактары, тигүү жана зергерчилик тармактары, ошондой эле социалдык маанилүү багыттар, анын ичинде спорттук долбоорлор өзгөчө көңүл борборунда болду.
Алмамбет Шыкмаматов кичи жана орто бизнестин субъекттерине ыңгайлуу салык режимин тандоо укугу – жалпы режимди, бирдиктүү салыкты же патентти колдонуу мүмкүнчүлүгү сакталып калганын кошумчалады. Бул ыкма ишкерлерге салык милдеттенмесин иштин көлөмүнө ылайыкташтырууга, ал эми мамлекетке туруктуу салык базасын түзүүгө шарт түзөт.
Салык кызматынын башчысы ошондой эле Кыргызстандагы салыктын ставкалары коңшу өлкөлөргө салыштырмалуу эң төмөн экенин жана бул экономиканы инвестиция тартууга жана адамдык капиталды өнүктүрүүгө багытталган стратегиялык артыкчылык экенин белгиледи.
