Өткөн жылы Баткенде айыл чарба багытындагы 5 жаңы ишкана ачылган
Былтыр Баткен облусунда айыл чарба продукцияларын кайра иштетүү жана сактоо багытында 5 жаңы ишкана пайдаланууга берилген. Бул тууралуу президенттин облустагы өкүлчүлүгүнө шилтеме берүү менен "Кабар" маалымат агенттиги жазды.
Аймактын экспорттук потенциалын жогорулатуу максатында Кадамжай районунда күрүчтү кайра иштетүүчү жана 3 заманбап мөмө-жемиш сактоочу жай ишке кирди. Ак-Турпак айылында Дүйнөлүк банк жана АРИСтин колдоосу менен күрүч цехи ачылып, 5 жаңы жумуш орду түзүлдү. Баткен районунун Самаркандек айылында жеке ишкер тарабынан өрүктү кайра иштетүүчү ишкана ишке киргизилип, 10 адам туруктуу жумушка орношту.
Муздатып сактоочу жайлар Кадамжайдын Бирлик айыл аймагында (350 тонналык), Төрт-Гүл айылында (500 тонналык) жана Кызыл-Бел айылында (170 тонналык) ачылды. Бул жайлар жемиштерди сактоого жана логистиканы жакшыртууга багытталган.
Бул ишканалардын ачылышы Баткен облусунун айыл чарба продукцияларын сапаттуу иштетүүгө жана кошумча нарк менен чет өлкөлүк базарларга экспорттоого жол ачат.
