Ош облусунда ишкерлердин укуктарын коргоо маселеси талкууланды
Ош облусунун прокуратура органдары укук коргоо, фискалдык жана башка мамлекеттик органдардын, жергиликтүү өз алдынча башкаруу органдарынын жана банк мекемелеринин жетекчилеринин катышуусунда ишкерлер менен жолугушууларды өткөрдү. Бул тууралуу Башкы прокуратурадан билдиришти.
Жолугушууларда ишкердик субъекттеринин укуктарын коргоо маселеси талкууланып, бизнеске мыйзамсыз кийлигишүүгө жол берилбей турганы белгиленди. Мыйзам бузуу фактылары аныкталган учурда тиешелүү чаралар көрүлөрү маалымдалды.
Ошондой эле Кыргыз Республикасынын Президентинин 2026-жылдын 28-январындагы №18 Жарлыгына ылайык, 2026-жылдын 31-декабрына чейин пландан тышкаркы салыктык текшерүүлөргө тыюу салынганы түшүндүрүлдү.
Мындан тышкары, ишкерлерге "Бизнес коргоо" мобилдик тиркемеси жана proverka.gov.kg маалыматтык системасы тууралуу маалымат берилип, жеңилдетилген насыялар жана салыктык жеңилдиктер боюнча түшүндүрмө берилди.
Жыйынтыгында ишкерлер өздөрүн кызыктырган суроолорго жооп алышып, алардын мыйзамдуу укуктарын коргоо багытындагы иштер улантылары белгиленди.
