Баткенде күнөсканада өстүрүлгөн кулпунай кирешелүү бизнеске айланды
Баткен облусунун Лейлек районундагы Раззаков шаарына караштуу Чымген айылынын тургуну Аззамкул Ташбеков күнөсканада кулпунай өстүрүү менен ийгиликтүү ишкерлик жүргүзүүдө. Бул тууралуу өкүлчүлүктөн билдиришти.
Маалыматка ылайык, учурда ал кооператив мүчөлөрү менен бирге түшүм жыйноо иштерин жүргүзүп жатат. Ал эми жубайы өстүрүлгөн кулпунайды ички базарда сатууда.
Алар өстүргөн кулпунайга суроо-талап жогору болуп, анын бир килограммы 1500 сомго чейин бааланууда. Ишкер кулпунайды күнөсканада гана эмес, ачык талаада да тамчылатып сугаруу ыкмасы аркылуу өстүрүүдө.
Өкүлчүлүктөн билдиришкендей, Аззамкул Ташбеков сыяктуу эле Чымген айылынын 25 тургуну бир кооперативге биригип, “Айыл чарба жана азык-түлүк коопсуздугу боюнча глобалдык программа” (GAFS) жана Дүйнөлүк азык-түлүк программасы каржылаган долбоордун алкагында колдоо алышкан. Долбоор Баткен облусунда азык-түлүк коопсуздугун чыңдоого багытталып, катышуучулар атайын окутуулардан өтүшкөн.
