Кыргыз ишкерлери Ташкентте жаңы келишимдерди түзүүдө
Экономика жана коммерция министрлигине караштуу Соода өкүлчүлүгү аймактык бизнес-ассоциациялар менен биргеликте 2026-жылдын 1–2-апрелинде Ташкент шаарында бизнес-миссия өткөрүүдө. Бул тууралуу ведомстводон билдиришти.
Программанын алкагында 32 ишкерден турган делегация Кыргызстандын Өзбекстандагы Элчилигине барып, UzFood 2026 эл аралык көргөзмөсүнө катышты. Ошондой эле B2B форматындагы жолугушуулар өткөрүлүп, жаңы ишкердик байланыштар түзүлдү.
Катышуучулар "Кыргыз Экспорт" мамлекеттик мекемеси уюштурган улуттук павильон менен таанышып, ата мекендик продукцияларды илгерилетүү мүмкүнчүлүктөрүн карашты.
Маанилүү жыйынтыктардын бири катары Өзбекстан Республикасынын Соода-өнөр жай палатасынын Ташкент шаардык башкармалыгы менен кызматташтык жөнүндө меморандумга кол коюлду.
Мындан тышкары, делегация East CAN Solutions ишканасына барып, өндүрүш процесстери жана кызматташуу багыттары менен таанышты. 2-апрелде ISKO кондитердик фабрикасына баруу пландалууда.
