Ар бир үчүнчү кепилдик — аялдарга: Кыргызстанда ишкер айымдарга колдоо өсүүдө
"Кепилдик фонд" ААКсы Кыргызстанда аялдар ишкердигин колдоону ырааттуу улантып, өз бизнесин өнүктүрүп жаткан аялдар үчүн каржылоого жеткиликтүүлүктү кеңейтүүдө. Бул тууралуу аталган фонддон билдиришти.
Маалыматка ылайык, 2026-жылдын биринчи кварталынын жыйынтыгы боюнча аял ишкерлерге берилген кепилдиктердин үлүшү жалпы кепилдиктердин 32%ын түздү. Башкача айтканда, дээрлик ар бир үчүнчү кепилдик аялдардын бизнесин колдоого багытталган.
Аталган мезгилде фонд тарабынан 297 млн сомдон ашык суммага 123 кепилдик берилген. Натыйжада ишкерлер дээрлик 1 млрд 242 млн сом көлөмүндө кредиттик каражаттарды тартууга мүмкүнчүлүк алышкан. Бул каражаттар айыл чарба, соода жана кызмат көрсөтүү сыяктуу экономиканын ар түрдүү тармактарындагы долбоорлорду ишке ашырууга багытталган.
Жалпысынан, фонд иш алып барган мезгил аралыгында аял ишкерлерге 5 млрд 134 млн сомдон ашык суммага 7 802 кепилдик берилген. Мунун негизинде 15 млрд 339 млн сомдон ашык көлөмдө кредиттик каражаттар тартылып, өлкөдө аялдар ишкердигин өнүктүрүүгө олуттуу салым кошулууда.
Бүгүнкү күндө кепилдик колдоосун алган аялдар Кыргызстандын бардык аймактарында бизнес-долбоорлорун ийгиликтүү ишке ашырып, экономикалык активдүүлүктүн туруктуу өсүшүнө жана диверсификациясына салым кошуп келишет.
