Кара-Сууда “Ала-Тоо-Амир” ишканасы курут, чалап жана шербеттин түрлөрүн өндүрүүдө
Ош облусуна караштуу Кара-Суу районунун аймагында жайгашкан “Ала-Тоо-Амир” жоопкерчилиги чектелген коому кайра иштетүү өнөр жайы тармагында туруктуу иш алып барып келет. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Ишкана учурда курут, чалап жана шербеттин түрлөрүн өндүрүп, күнүнө 6-8 тонна продукция чыгаруу мүмкүнчүлүгүнө ээ. Өндүрүш жергиликтүү чийки затка негизделип, ички рынокту сапаттуу азык-түлүк менен камсыз кылууга багытталган.
Бүгүнкү күндө ишканада мамлекеттик колдоо программаларынын жана жеке инвестициялардын эсебинен өндүрүштү кеңейтүү жана модернизациялоо иштери жүрүүдө. Бул аракеттер өндүрүш көлөмүн арттырууга, продукциянын сапатын жогорулатууга жана жаңы жумуш орундарын түзүүгө шарт түзөт.
“Ала-Тоо-Амир” ЖЧКсы аймактагы кайра иштетүү тармагын өнүктүрүүгө олуттуу салым кошуп, жергиликтүү ресурстарды натыйжалуу пайдаланган алдыңкы ишканалардын бири катары өз ишмердүүлүгүн улантууда.
