Business Caravan 2026: Аймактарда ишкерлер үчүн көчмө бизнес-платформа өттү
2026-жылдын апрель айынын аягы жана май айынын биринчи жарымында Кыргызстан аймактарында Business Caravan 2026 көчмө бизнес-платформасы өткөрүлдү. Бул тууралуу Экономика жана коммерция министрлигинен билдиришти.
Иш-чара Талас, Ош, Манас, Нарын жана Каракол шаарларында уюштурулуп, ага мамлекеттик органдардын өкүлдөрү, эксперттер, бизнес-ассоциациялар жана ийгиликтүү ишкерлер катышты.
Сессияларда ишкердикти колдоо боюнча мамлекеттик саясат, каржылоо мүмкүнчүлүктөрү, салык жана эмгек мыйзамдарындагы өзгөрүүлөр, ошондой эле аялдардын ишкердиктеги ролун жогорулатуу маселелери талкууланды.
Мындан тышкары, франшизалардын, жеткирүүчүлөрдүн жана бизнес кызмат көрсөтүүчү компаниялардын көргөзмөлөрү уюштурулуп, катышуучуларга жаңы өнөктөштөрдү табууга жана ишкердик байланыштарды кеңейтүүгө шарт түзүлдү.
Уюштуруучулардын айтымында, долбоордун негизги максаты — аймактарда туруктуу бизнес-экосистеманы калыптандыруу жана ишкерлерге заманбап билим берүү.
