Салык кызматы иш жүргүзбөгөн ишкерлерди каттоодон чыгарууда
Мамлекеттик салык кызматы иш жүргүзбөгөн юридикалык жактарды жана жеке ишкерлерди мажбурлап каттоодон чыгаруу иштерин улантууда.
Маалыматка ылайык, төмөнкү учурларда салык төлөөчүлөр каттоодон чыгарылат:
- 1 жылдан ашык убакыт салык отчету тапшырылбаса;
- акыркы 2 жыл ичинде экономикалык ишмердүүлүк боюнча маалымат болбосо.
Белгиленгендей, процесс автоматтык түрдө жүргүзүлүп, айып санкциялары каралган эмес. Бул чара салык базасын жаңылоо жана салыктык башкарууну жөнөкөйлөтүү максатында ишке ашырылууда.
Учурда каттоодон чыгарылуучу тизмеге жалпы 21 миң 584 салык төлөөчү кирген. Анын ичинен:
- 8 миң 712си юридикалык жак;
- 12 миң 872си жеке ишкер.
Салык кызматы каттоодон чыгарылуучу жарандардын тизмеси мекеменин расмий сайтындагы "Башка бөлүмдөр" бөлүмүндө жарыяланганын маалымдады.
Эгер салык төлөөчү өзүн тизмеден таап, ишмердүүлүгүн улантууну кааласа, салык органына кайрылып, тизмеден чыгууга мүмкүнчүлүгү бар.
Ал эми ишмердүүлүгүн токтотууну пландагандар үчүн кошумча аракеттер талап кылынбайт.
