“Талас Даамы” ишканасы 30 тоннага жакын сүт кабыл алууда
Суу ресурстары, айыл чарба жана кайра иштетүү өнөр жайы министринин орун басары Рустам Балтабаевдин Талас облусуна болгон иш сапарынын алкагында аймактагы ири сүттү кайра иштетүүчү ишканалардын бири болгон “Талас Даамы”ишканасынын ишмердүүлүгү менен таанышты.
Айыл чарба министрлигинин маалыматына ылайык, сүт жана сүт азыктары өлкөнүн азык-түлүк коопсуздугун камсыз кылуучу стратегиялык продукциялардын бири болуп саналат, ал эми Талас облусу сүт өндүрүү жана кайра иштетүү боюнча алдыңкы аймактардын катарына кирет.
“Талас Даамы” ишканасы сезон маалында күнүнө 30 тоннага чейин сүт кабыл алып, кайра иштетет. Ишкана быштактын жана сары майдын кеңири ассортиментин өндүрүп, жергиликтүү фермерлер менен туруктуу кызматташтыкты түзгөн. Бүгүнкү күндө ишкана өндүрүш көлөмүн көбөйтүү жана экспорттук мүмкүнчүлүктөрүн кеңейтүү үчүн олуттуу потенциалга ээ.
Жолугушуунун жүрүшүндө ишкананын негиздөөчүсү Бакыт Тууганбаев сүт тармагын өнүктүрүүгө, чийки зат базасын чыңдоого жана ата мекендик өндүрүүчүлөрдү колдоого багытталган бир катар сунуштарын билдирди. Өз кезегинде ишкана өндүрүш кубаттуулугун кеңейтүүгө, фермерлерден сүт сатып алуу көлөмүн көбөйтүүгө жана ата мекендик сүт продукциясынын экспорттук потенциалын мындан ары арттырууга даяр экендигин билдирди.
